الاثنين، يونيو 23

أهلا بيكم

النهاردة هانتكلم عنى!
.
البداية دى فكرتنى بدكتور ابراهيم الفقى
كان بيتكلم عن الإصغاء للآخر
وقال مثال عن ممثلة غربية كانت بتكلم شخص ما عن نفسها كتيير
فلاحظت أنه مل من الحديث وزهق من كتر كلامها
فقالت :أنا اتكلمت كتيير وماسمعتكش
جه دورك إنك تتكلم
قوللى : ايه رأيك فياااااا؟
.
أهلا بيكم
.
.
النهارده هانتكلم عنى.
.
دارت رحايا العمر دورانها
وفكرت فيا
أحمد كمال بعت لى واجب الأسرار
بعد ماحله بمحمل جد مش بهزار
قرر يشوطه فى ملعب الاصرار
والدنيا دوارة والكورة جات فيا
.
دارت رحايا العمر بصاحبها
وفكرت فيا
.
الباحث الكشاف عن الأنوارودى حقيقة
علشان همام عمل واجبه ده فى دقيقة
وبضحكة صافية وسليمة وحلوة ورقيقة
قاللى ده واجب سهل كالميه .."المياه"
.
دارت رحايه العمر بصاحبها
وفكرت فيا
.
وللعلم البسيط وللمعلوم
انا اتطقست يمكن أعرف المقسوم
لاقيت لعلها خير كانت حلاه
بدعوة من نونو مع هديه
.
دارت رحايا العمر بصاحبها
وفكرت فيا
.
ومشيت ورا النونو فى حارة سد
أولها عطفة لنهر الحب قلم الجد
وآخرها للشيخ ياسر الغسلان
وده بيته جنب الحرم
وصحبته هنيه
.
دارت رحايا العمر بصاحبها
وفكرت فيا
.
أهلا بيكم
.
زى ما عودتكم أو لسه هاوعودكم يعنى هاتتعودوا هاتتعودو
إنى أكون متأخر
فأنا جالى واجب الأسرار متأخر وكمان جاوبت عليه متأخر
علشان كدة متهيألى إن ما فيش حد ما يعرفهوش
واللى ما يعرفهوش يروح للى شرفونى وفضحونى وبعتهولى
أحمد بيه كمال اللى طحنى فى الرحايا وتانى يوم الباحث اللى عايز يبحث عن حقيقتى اللى... ربنا يستر
طبعا أنا عمال أدور عن أقل ست مصايب سودة فى حياتى علشان يا رايح قلل م الفضايح
ومش عارف ليه كل ما افكر فى حاجة كويسة أحس إنى بأكدب أو باتجمل.
وعلى كل
ماى نيم إزززز مصطفى عبد المنعم محمد سليمان بدر
متزوج من خمس سنوات وأعول أجمل طفلتين فى العالم بدون مبالغة وهابقى أوريكم صورهم فى العيد
.
كيماوى تعيس كان نفسه يكون كيماوى بجد بس الكيميا غدارة
علشان كدة صبح لقا نفسه مهندس أنتاج-على حد قولهم- فى مصنع أغلفة مرنة وبعييييييد كل البعد عن الكيمياء العزيزة.
.
نقول خجول ونقول كسول ونقول عجول ودى أهم تلات فضايح فضحانى وقرفانى فى عيشتى على طول
.
ما بحبش الكبار من وجهة نظرى وبأهرب منهم الكبار فى المكانة والمنصب والشأن
ودايما الصغيرين حبايبى وأنا حبيبهم مع إنى كتيير باكون قاسى ومتسلط لكن قلبى ابيض-على حد قولهم-
.
عندى ونكدى وده وصف حماتى ليا والله العظيم ما بهزر
مش عارف الست دى جابت الكلام ده منين بس بجد بجد معاها حق وأضيف على كلامها فقرى كنتيجة منطقية جدا لوصفها المتأمل.
بالمناسبة متأمل. متأمل خالص. متأمل جدا. باعشق التفكر والتحليل والتقمس والتخيل المنطقى. ساعات بتخيل نفسى نقطة حبرفى ماكينة الطباعة علشان أوصل لحل مشاكل عويصة فى الشغل وبالفعل باوصل لحلول جميلة.
.
ما بحبش التليفزيون من زمان وباتغاظ منه أفضل مناقشة حامية أو جدال ساخن أو حتى نكت وفوازير لكن ما بعقدش الدنيا على الناس وبأحاول أعيش حالتهم النفسية علشان أقدر أقنعهم.
.
انفعالى ومتحمس فى أول الأمر بس كلام الليل مدهون بزبدة بأنسى بسرعة وبتوه علشان كدة ما بحققش حاجة.
.
ما بحبش أحرم وأحلل ولا أفتى بغير علم ولا أنتقد علماء الفتوى ونفسى الناس يحترموا علم الفتوى زى ما بيحترموا علم الفلك أو الكيمياء أو حتى الموسيقى. لكن تلاقى كل الناس دكاترة فى علم الفتوى بالذات.
.
هما دول الست اسرار اللييييى تسع أسرار
.
ها إتكلمت عن نفسى كتير
يللا جه دوركوا علشان أسمعكوا
ايه رأيكم فيييااااااا!
.
كل سنة وانتم طيبين

هناك 21 تعليقًا:

بنت الصالحين يقول...

اجابات حلوه اوي

وعجبتني رحايا ودارت وحاجات كده
اصلي بحب الشعر والسجع والكلام ده


ساعات بتخيل نفسى نقطة حبرفى ماكينة الطباعة علشان أوصل لحل مشاكل عويصة فى الشغل وبالفعل باوصل لحلول جميلة




ان دماغي وجعتني نطقه حبر في ماكنه
في ماكنه
حرااااااااااااام


بس اجابات جميله

بس نسيت تقول اسامي البنوتات

وياريت الصور تنزل قريبا

Ahmed Kamal يقول...

وقعت يا درش ولا حدش سمى عليك :) تسع أسرار مرة واحدة ؟

بس عجبتني قوي حكاية :

دارت رحايا العمر بصاحبها
وفكرت فيا

فعلا حليت الواجب على أجمل وجه ، و شكلي كده حاتوصى بيك في الواجبات ، علشان المواهب كلها تبان :)

تحياتي ليك .. بس صحيح إيه حكاية نكدي دي ، ما انت مرح معانا أهو ؟

الباحث عن الحقيقة يقول...

رحايا رحايا
كمان لما بتيجي تهزر بتقول شعر فلسفي
احنا كده هنضطر نصدق حماتك
وبعدين الحماة تعرف اكتر
وعندك عروستين وسايبني لايص
اممممم
ماشي يابو نسب
هستنى الصور
واهو لغاية العيد اكون حوشت برضه
جميل وصفك لنفسك كده بشكل سريع بدون تزويق ولا تجميل ولا تبرير
اه شخص عادي كده
صحيح متسلط
بس قلبك ابيض
ولا يكونوش بيقولولك كده علشان تخف عليهم شوية؟؟؟؟
اممممم
عموما طالما عارف بغلطتك يبقى كويس
اكيد ابيض
علشان كده كل بطيخه بتجيبها بتكون زي قلبك
ابقى بلاش تحضن البطيخة وانت شايلها علشان العدوى ابقى اشتري كيس
اتشرفنا بمعرفتك يا باشمهندس مصطفى الكيماوى
حلو اوي التاج ده بيقصر المسافات في تعرفنا على شخصياتكم
سعدت بتمريره إليكم علشان نكشف المستخبي
خاصة رأي حماتك

أختكم فى الله يقول...

أخى الكريم

انا عندى فى المدونة واجب بنمرره علينا كلنا .
إذا سمحت ومكنش عند حضرتك مانع يا ريت لو تحل الواجب عند حضرتك هنا فى المدونة .

تحياتى

في حب مصر يقول...

خجول وسول وعجول ونكدي وعنيد.. ونعم الشباب..ههههههههه
لا بجد كلامك عن نفسك ظريف ورأي حماتك فيك مش تهتم بيه خالص..ههههه

تحياتي

Mostafa Abdelmoneam Badr يقول...

عاشقة الفردوس
طب مادام بتحبى الشعر يبقى خدى من ده كتير

بس انتى نورينا وأنا هارد عليكى بكلم منظم وجميل

آيوة نقطه حبر إيه هى جات على هدومك؟

زى سمير الاسكندرانى بيقول إجعلنى طوبة!
طوبة طوبة بس بعيد عننا

اصل اسامى البنوتات هيعمل شوية جدل على ما أتوقع
وعلى كل

سناجق 4 سنوات
رقية تسعة اشهر

على فكرة كلاهما ولدت فى يوم 15 رمضان
سناجق يوم الجمعة بعد الظهر ورقية يوم الخميس بعد العصر

وأنا هاعمل لهم عيد عائلى فى اليوم ده كل سنة ومستنى إعتراضك على أحر من الجمر

البت سناجق هى اللى هاجوزها للباحث لو وافق على شروطى

نورتى المدونة
ربنا يبارك فيكى يا رب

Mostafa Abdelmoneam Badr يقول...

احمد كمال

آه يا رجلى, على جدور رقبتى يا أبو حميد
بس هاعمل إيه ربنا يقدرنا على فعل الواجب

اه والله حكاية نكدى دى صح
وأنا إتفاجئت بيها زيك بالظبط
وفضلت أضحك يمكن أسبوع ومن ساعتها باحاول اتعالج من الداء ده وما فيش فايدة

Mostafa Abdelmoneam Badr يقول...

بحوثى من قبل ما اقابله

أولا وقبل أى حاجة
أنا قاعد على الجهاز وطبق البطيخ جنبى
البطيخة لونها روز على ابيض
واللب لونه خشبى
وطعمها من غير حلفان زى العسل
زى ما تكون بتطلع لك لسانها

وبعدين إنت لسة ماحوشتش ومستنى تحوش فى الاربع شهور اللى فاضلين ع العيد
يا خوفى تكون معتمد ع العيدية

على كل فيه شوية شروط كدة مع العلم إن نسبك يشرفنى

بس مبدئيا كدة أخبارك ايه لما التليفزيون بيكون شغال والكل مبحلق له.

عفارم عليك!
نكدى.. من وجهة نظر حماتى
ومن وجهة نظرى أنا عندى.. آه أقصد شاب طموح مناضل عصامى مستنى العيدية

فى انتظارك دائما
ومشتاقين للجديد

Mostafa Abdelmoneam Badr يقول...

أختكم فى الله

ده انتى غاوية مشورة وأنا لسة واقع على جدور رقبتى

روحت مدونتك الجميلة جدا
لاقيت الواجب هو اللى انتى ما كلفتيش خاطرك تقريه

وحدفتى التعليق ورحتى جريتى تبعتيه لباقى الناس

على كل
أنا حليت الواجب ونص
يعنى بدل الستات تسعات

إرجعى بقا وإقرى يمكن تستفيدى
مع خالص تحياتى

Mostafa Abdelmoneam Badr يقول...

فى حب مصر
خجول وسول
مين سول ده
قلت انا لوزباشى قصدى كيميائى مش صول

هات ودنك"حماتى بتقرا المدونة"

خد ودنك

ده أهم حاجة عندى رأى حماتى.

فى إنتظار جديد فى مدونتك الجميلة
مع اعتزازى

الباحث عن الحقيقة يقول...

سناجق
وعايز تتشرط عليا كمان
انا بحذرك لو سناجق ..يبقى لازم تكون حلوه
ماهو حاجه ..قصاد حاجه
تعرف ..حماتك صعبت عليا
عندها حفيده اسمها سناجق
اكيد حماتك ذنوبها كتير
هههههههههه
مين سناجق ده يا عمو
انت بتجيب الاسامي دي منين
حرام عليك البنت لما تكبر هترفع عليك قضية
وانا اللى هترافع فيها
هات حته بطيخ هات
هات يابو سناجق

بنت الصالحين يقول...

سناجق 4 سنوات
رقية تسعة اشهر


لا مش فاهمه
ياريت افهم يعني
معناه ايه سناجق دي

( وجه مستغرب)


رقيه مفهومه وعسول كمان
لكن سناجق
سناجق

بس ربنا يخليهوملك يارب

عايزين صورهم بقي

Unknown يقول...

السلام عليكم ورحمة الله وبركاته
مع اصرارى
الاستاذ مصطفى
ابو سناجق ورقية
العجول الكسول الخجول
و(ما خفى كان اعظم)
الاسماء بتاعتك بس ياأستاذ مصطفى تعمل تدوينة بحالها لكن احنا اللى كاتبنها ولاجل هذا
ماهى حلوة وخفيفة
وجميلة ورشيقة
مثل تاجك وكلامك
وردودك وسلامك
(احسدك فى الله ياأستاذ مصطفى لانك انهيت واجبك لانى واحدة ممن (ارسل)لها الاستاذ .احمد كمال هذا الواجب العجيب
واسمع اللى جايه دى
مرسل لى اثنين قبله
فالمجموع بقى ثلاثة
ليس واحد ولا اثنين بل
ثلاااااااااااااااثة
واجباااااااااااات
وربنا يعينااااااا
على حلهم كلهممممم.
وتقبل احتراماتى ودعواتى.

Unknown يقول...

السلام عليكم ورحمة الله وبركاته
مع اصرارى
سعدت سعادة بالغة حين رأيت اسم (مدونتى) مكتوبآ عندكم فهذا شرف
ما بعده شرف لىّ
ولكن
أواه من لكن دى
الرابط لا يعمل
ارجو الاهتمام بإصلاحه
وتقبل عظيم احتراماتى
(لا تقول لى مثل الاستاذ
احمد كمال ان هناك خطأ
فى مدونتى فالرابط يعمل عند كثير
من الاصدقاء فلماذا لا يعمل عندك
وعنده فقط(رابط مجداوية ايضآ لايعمل عندك...................ممممممممم!!!
وعذرآ للاطالة

صبرني يارب يقول...

عاجبنى البوست
وما عنديش معلومات عنك ولا انطباعات كتير عنك غير الى انت قلته

بس جميل انك عارف عيوبك رغم انها خطيره بس ما دام عارفها تبقى سهله


لكن عاجبنى دماغك بصراحه ما قريتش لك كتير فى المدونه مستعجله معلش خطفت كام سطر كده

قريت بس موضوع القوامه واستمخخت منه تماما

ربنا يكرمك

مجداوية يقول...

السلام عليكم

أحسن الله اليك أخى الكريم كما أحسنت الى فقد زادنى شرفا زيارتك والتعرف على مدونتك وجزيل الشكر على وضع اللوجو للحملة ولكن بالله عليك أزل انه منى فهو حبا فى رسول الله لا يكتب معه شيئا آخر

جزاك الله كل خير وبارك الله

Mostafa Abdelmoneam Badr يقول...

الباحث عن الحقيقة

إنت من أولها هاتحاكمنى وهاتعصى عليا البنت
بص هاتتجوزها يعنى هاتتجوزها

وخاصة لما تشوف الصورة
بنت مسكر خلص وحبيب بابا

Mostafa Abdelmoneam Badr يقول...

عاشقة الفردوس

قريب جدا هانزل الصور بتاعة الكتاكيت
وعايزين نفكر مع بعض فى حاجة نعملها علشانهم فى التدوين
لو فيه بالفعل ياريت تعرفينى

Mostafa Abdelmoneam Badr يقول...

norahaty
سعدت جدا بتعليقك
وأخجلنى مديحك الراقى
ربنا يبارك فيكى وما يحرمناش من دعواتك الصادقة

بالنسبة للرابط فأنا أضفته لأتشرف به
ولأسعد دائما بمتابعة مواضيعك الشيقة
ولكن فعلا هناك مشكلة وإن شاء الله هاحاول أفهمها وحضرتك برده تحاولى مبدئيا أنا باستخدمه زى ما هو بأفتح بيه مدونتك وكذلك مدونة مجداوية.
وإن شاء الله نفهم السبب

مع خالص تقديرى لشخصك الكريم جدا
تقبلى تحياتى

Mostafa Abdelmoneam Badr يقول...

صبرنى يا رب

نطق إسم مدونتك لوحده خير
وإنت كلك خير

ربنا يبارك فيكى
وأنا متواصل إن شاء الله مع موضوعاتك

مع خالص تقديرى

Mostafa Abdelmoneam Badr يقول...

مجداوية

إنتماء جميل
يظهر من أول وهلة

تحت أمرك لقد أزلت إسمك من تحت اللوجو
وحفرته فى قلبى
جعلك الله من أهله
وحشرتى يوم القيامة تحت لواء الحمد مع خير البرايا صلى الله عليه وسلم

ربنا ما يحرمناش منك

مع خالص تقديرى