الأربعاء، يونيو 11

اربع سنين يا علوم


أفكار فى عقلى ومجننانى

دى مدونة Vague اللى أنا مش عارف أنطق اسمه واللى nonoymm اللى انا باحاول أنطق اسمها صح ردت على التدوينة الأخيرة بتاعتى وقالت لى انها ردت على موضوعى فى التدوينة بتاعتها من خلال

تعليقها على تعليقه ع التدوينة بتاعتها.

حد فاهم حاجة؟

طب كويس.

ده شيء يسعدنا كلنا لأن اللى كان هايفهم كنت هاديله ربع جنيه.

المهم رحت أزور ها الزول كان هايجننى زى ما هو كدة يعنى.

فكرنى بأيام ........... اهى ايام.

وخلانى فتحت الاجندة عشان ارد عليه من واقع الماضى الأليم.

حد فهم حاجة. ياما انت كريم يارب.

المهم ايه رأيكم فى الكصيدة دى؟

.

أربع سنين يا علوم

م العمر محسوبة

.

.

عشناها نبنى ف آمال

ونرص طوبة طوبة

نحلم يضيع حلمنا

ونقول دى مكتوبة

نرجع نعيد اللى كان

ولا يوم نقول توبة

.

.

اربع سنين يا علوم

م العمر محسوبة

.

.

كان البكا كل يوم

والفرح.. ولا نوبة

من يوم ما جالى الجواب

من مكتب التنسيق

بدأ صراع الكتب

والأوضة مقلوبة

ده كمان خلاف القلق

والأهل مكروبة

.

.

اربع سنين يا علوم


م العمر محسوبة

.

.

تمقيق عيون وعذاب

والنفس مغلوبة

مافى واد خدك دبلوم

ولا بت مخطوبة.


هناك 7 تعليقات:

شفقة هانم واحسان بك يقول...

اربع سنين بحالهم....وكمان علوم...لا بجد ربنا يكون فى العون...عندك حق تكتب اللى كتبته...ربنا معاك بوست مفيش زيه نظرا لصعوبة العلوم
شفقة

عصفور المدينة يقول...

أعرف ناس بيقولوها سبع سنين
:)

مع اصرارى يقول...

شفقة هانم
والله اسم على مسمى كلك شفقة وإحساس.
فعلا أنا أستحق الشفقة
بس ياريت لو إحسان كمان
ولا أقولك
أنا جاى عندكودلوقتى أطلب الشفقة والإحسان
تحياتى

عصفووور المتينة
تب والله ان فرحت كتيييير
انا كنت عاوز أجيلك أنا الأول
بس انت كلك خير وسباق يا باشا

تعرف ناس بيقولوها سبع سنين
وأنا أعرف ناس بتقول كانت شورة طين

قلبى بيوجعنى لما افتكر السيرة دى

افتكر لنا حاجة تتاكل احسن
تحياتى لجنابك العالى

nonoymm يقول...

السلام عليكم
دة كلام يعني انا زيها برضه مش فاهم انا قصدت ايه تعالى في الخفا وقولي اقولك بتسيحلي:)
طيب اسمي نونو واي ام ام
نونو اسم دلع خاص جداااااا
والحروف التلاتة اول حرف من اسم 3 من ولادي خلاص
الموضوع بتاع حضرتك يشبه سؤال كتبه لي vague
عندي في تدوينة الا ليعبدون
انا جاوبت عليه عندي باستفاضة شوية
تعالى اقرا سؤاله واجابتي عليه
+ تدوينتك لماذا خلقنا الله + تدوينتي الا ليعبدون يطلع = تعليقي على تدوينتك لماذا خلقنا الله
فهمت ولا طلاسم برضه
لو طلاسم برضه يبقى العيب كان في عميد الكلية بتاعت العلوم ديه
تحياتي وتقديري
وبكرة تتردD:هههههههههههههههههه

مع اصرارى يقول...

اوه نوه واى إم إم
لا ما دام دى ميسيو خالد واى إم إم
صح كدة؟
عرفتها لوحدى
ياسلام ع الزكاوة
اصل زوج سيادكم زارنى
آه والله وبهدل الدنيا نور.
أخلاق وذوق ومجاملة حاجة ماتتوصفش
عامل آل يعنى لقى لقية دهب وياقوت
بس ماقالش مرجان مع ان فيه.
رحت مدونته لاقيت زاد ربنا يزيده

ايوه ياستى ربنا يهنى سعيد بسعيد ب YMM
وبلغيه اسمى تحياتى
وأنا فى إنتظاره هو والسبعة صحابه اللى عازمهم.
وطبعا البيت بيته

Vague يقول...

اخيرا عرفت اكتب تعليق

ليه بس كده الطرق الصعبة دي

...
انت بقة في علوم ايه؟؟

الاسم يا سيدي: فايج (غامض)

بس انا بحب ادلعوا واقول فايجو

البوست جميل وخد دي:

عمالين نتعلم واما بنتسأل بنبلم واما نتخرج بنعلق الشهادة تحت بير السلم

تحياتي

غير معرف يقول...

comment59, [url=http://h2o.law.harvard.edu/user/profile.do?userID=14012]order valium 10mg[/url], =-], http://h2o.law.harvard.edu/user/profile.do?userID=14012 buy valium 10mg, :-), [url=http://www.ziggs.com/apps/profile/Interests.aspx?uid=139855]order zolpidem online[/url], :-), http://www.ziggs.com/apps/profile/Interests.aspx?uid=139855 buy zolpidem, %[[, [url=http://www.ziggs.com/apps/profile/Interests.aspx?uid=139998]order cheap vicodin[/url], qwd, http://www.ziggs.com/apps/profile/Interests.aspx?uid=139998 order vicodin online, %[[, [url=http://h2o.law.harvard.edu/user/profile.do?userID=14011]cheap alprazolam[/url], :-), http://h2o.law.harvard.edu/user/profile.do?userID=14011 order cheap alprazolam, :-), [url=http://www.chop.edu/forum/user/profile/12410.page]zolpidem no prescription[/url], jfn, http://www.chop.edu/forum/user/profile/12410.page zolpidem no prescription, :-)