الأحد، يونيو 8

دعوة عامة

ياترى فيه حد سمع عن سلسلة الكتب دى؟
هو أكيد آه طبعا كتير بس السؤال للتشويق مش أكتر!
وعلى كل

دى سلسلة كتب بتصدر عن مؤسسة ويلى للنشر وده موقعها
الكتب دى أنا بصراحة ما قريتش منها حاجة بس عجبتنى قوى فكرتها وناوى أأقراها(سوف تانى مافيش فايدة).
بس فكرتها أوحتلى بفكرة أهم ليا وليكوا والله أعلم.
الكتب دى فى مجالات الكومبيوتر المختلفة ومكتوبة للناس اللى زى حالاتى ما بيصبروش ع القراية وبيزهقوا بسرعة.
هى كتب متعالجة علشان تخليك متلذذ وانت بتقراها ومنسجم
لغة سهلة جدا رسوم كاريكاتير يمكن ونكت كمان.
طيب واحنا مالنا؟
أيوة صحيح وانتوا مالكوا انتوا؟
أصل أنا عاوز اقول إن احنا لغتنا صعبة وعمالة تتغير وتتبدل فيها المصطلحات لحد ما العربى بقا عايز يترجم بالعربى وده طبعا عند بعض الناس اللى زى حالاتى مش واخدين ع القراية الكتير.
يعنى لو جيت فتحت كتاب زى تفسير ابن كثير ولا البداية والنهاية ولا إحياء علوم الدين بلاقى نفسى بصدع بسرعة وبسرح كتيير لإنى ماتعودش ع القراية للأسف.
والحل دلوقتى حاجة من اتنين
الأولى أنى اتعود ع القراية (وسوف أحاول)
والتانية ان احنا نترجم أو نشرح لبعض امهات الكتب فى سلاسل متتابعة الحلقات باللغة الدارجة العامية.
وطبعا هنا فيه عيوب وفيه مميزات للفكرة.
نبدأ بالتبشير
  1. - كدة اللى ما بيقراش هايقرا واللى ما بيستوعبش هايستوعب واللى عاوز ينقد هاينقد فى التعليقات واللى عاوز يستفسر هايستفسر.
  2. - كدة احنا هانعمل حلقات علم كل واحد او واحدة هايكون رائد فيها للكتاب اللى اتبناه وهاتظهر مناقشات بناءة مبنية على كلام العلماء.
  3. - كدة هانتحمل مسئولية تعليم بعض ومش هاتبقى حر تقرا ماتقراش محدش ليه حاجة عندك لا يا حلو ده احنا مستنيين حلقاتك اللى انت عاهدت ربنا انك تكتبهالنا.
وأما التنفير
  • كدة احنا بنموت اللغة وبنوجد بديل للقراءة فى أمهات الكتب.
ومش لاقى عيوب تانية غير العيب ده. ويا ريت على كدة وبس ده انا زى ما غنيت هارد على نفسى.
  • لا يا مفتح بالعكس ده كدة لو انا فتحت كتاب كنت باخاف افتحه زمان هاحس اننا مش غريب جواه لأنه اتشرحلى قبل كدة وفهمت معانيه.
طبعا لسة فيه مميزات وعيوب وإقتراحات وتعديلات تانية
بس مش من عندى المرادى
يللا يا حلوين أنا مستنى رأيكم الهدام قصدى الهداف فى الفكرة دى.
وياريت الحاضر يبلغ الغايب وخاصة لإنى استعجلت فى الموضوع ولسة ماحدش كتير يعرفنى.
والآن الى الإعلان الرسمى:-
دعوة عـــــامــــــــة
و
رجـــــــــــــــــاء
من كل المدونين العرب الى دمج مدونة اخرى مع المدونة الاولى الاصلية.
على ان ترتبط المدونة الجديدة بإسم كتاب من المراجع الاصيلة فى مختلف مجالات العلوم المختلفة.
وأرشح منها بناءا على رغبتى الخاصة البداية والنهاية لابن كثير كتاب الموطأ للإمام مالك كتاب الحيوان للجاحظ كتاب طوق الحمامة لابن حزم كتاب احياء علوم الدين للغزالى كتاب الأغانى للأصفهانى.
على أن يقوم المدون بشرح الكتاب الذى يختاره من تلك الكتب أو غيرها فى مدونته الجديدة على شكل حلقات متتالية تتناول ابواب الكتاب شرحا باللغة الدارجة العامية المصرية القاهرية لكونها الأكثر شيوعا ومعرفة فى جميع دول وطننا العربى الكبير.
وإننى ارشح هذه المدونة"مع اصرارى" للتنسيق فيما بين السادة المدونين حتى يتم اختيار كتاب منفرد لكل مدون ولا يحدث تكرارا للكتب بين المدونين.
وسيكون هذا الموضوع مرجعا مفتوحا لكل من اراد التسجيل بأسم مدونته الجديدة واسم الكتاب الذى سيتولى شرحه لباقى الأخوة المستفيدين من المشروع على أن أقوم أنا بصفة دورية بتنقية الفهارس ورفعها فى موضوع جديد لمن اراد ان يتعرف على المدونات المتاحة والكتب التى تتناولها بالشرح.
وهذا الجهد العظيم منكم سوف يكون بمثابة عمل ايجابى بناء من أجل توحيد أبناء هذه الأمة على عمل الخير وتكريث الجهود لإستعادة مجد الثقافة العربية ورفع المستوى الثقافى لأبناء هذا الوطن الكبير.
والله ولى التوفيق.
والسلام عليكم ورحمة الله وبركاته.

هناك 12 تعليقًا:

Ahmed Al-Sabbagh يقول...

بجد انا فخور بيك

وبمدونتك

وبكلامك الجميل

وسعيد اوى انك بقيت بيننا

وان شاء الله هتضيف كتير لعالم التدوين

وياريت دايما نبقى على اتصال

واى حاجة تعوزها فى المدونة او غيرها

اعتبرنا اخواتك واكتر

وشعرك جميل جدا جدا جدا

وسعيد وفخور بيه بجد

تحياتى لك

احمد الصباغ

Ahmed Al-Sabbagh يقول...

لو حبيت تشيل الكومنت موديراشن عشان اللى يكتب كومنت يشوفة مباشرة يبقى كويس اوى

عروسة ننوسة يقول...

والله فكرة جيدة...موفق ان شاء الله

الـسـيـدة نـون يقول...

اممممممممم
بص يا مصطفى اللى فهمته من كلامك
انى مثلا اتطوع انى اشرح كتاب من اللى انت ذكرت اساميهم
صح ولا انا غلطانة؟
لو صح
يبقى احب اقولك انى محتاجة حد يشرحلى الكتب اللى انت قلت عليهم دى
وانا بعغد كدة اخد الكلام اللى اتشرحلى واكتبه فى المدونة الجديدة

بس عموما انا عندى فكرة تانية
انا مش هاعلن عنها دلوقتى علشان دى هتكون بمساعدة والدى
فبالتالى مش عايزة اوعدكم بحاجة ممكن ماتتنفذش
استنى عليا شوية هاعرض الفكرة على والدى
ولو وافق
هاقولك عليها
هى فكرة شبيهة بفكرتك كدة

وربنا يسهل
ونعمل حاجة كويسة

تحياتى ليك ولزوجتك العزيزة
اختك خيخة

Ahmed Kamal يقول...

أولا إنت تشكر على فكرتك ، و هدفك النبيل ، لكن إسمح لي أختلف معاك في فكرة تبسيط الكتب دي بالعامية لأن:

1. الفكرة دي تقلل مستوى الثقافة العربية - مش ترفعها ، لأنها مش حاتبقى عربية خلاص .

2. الكتب دي تفقد جزء كبير من قيمتها و معناها لو تفككت بالشكل ده .

3. يا ترى الناس حاتفهم القرآن بعد كده إزاي ، و الا حانعمله quran for dummies كمان ؟

و في المقابل ممكن البديل يكون عمل ملخصات و مبسطات للكتب الصعبة ، بلغة عربية فصحى ، لكن بسيطة يفهمها العامة ، مثل لغة الجرائد و المجلات ، و بكده فعلا ترفع المستوى الثقافي للناس بدل ما تنزل بيه ، و في نفس الوقت تقرب لهم الكتب الصعبة . و أظن الفكرة دي لها نفس المميزات اللي حضرتك ذكرتها للفكرة الأولى .

و الا انت إيه رأيك ؟

عاشــــــ النقاب ـقــــة"نونو" يقول...

السلام عليكم
الفكرة حلوة جدااااااااااااا بس محتاجةتفكير دقيق حبتين
لان دي تفاسير جامدة اصلا محتاجة تركيز ومش اي حاجة تتكتب
زي استاذ احمد كمال ما قال كدة
بس عندي استعداد للمشاركة بس النت يتعدل
بارك الله فيك
تحياتي

Mostafa Abdelmoneam Badr يقول...

وجود أحمد الصباغ فى مدونى خلانى عرفت ان الاحلام بتتحقق بسرعة فى عالم التدوين.
منور والله يا خال وأنا اللى فخور بنفسى ان حضرتك ضيف مدونتى.
وأنا فعلا عاوز حاجات كتيير أولها رأيك فى الفكرة دى.
والبقية تأتى.
تقبل تحياتى


نورتى المدونة يا جنة.
كويس ان الفكرة عجبتك. ويارب تكون ليكى مشاركة فيها وشكرا لدعواتك.


أم شريف
بصى بقا يا ست الكل
الفكرة دى فيها تبادل منفعة يعنى انت تختارى كتاب من الكتب اللى نفسك تقريها ايا كان.
مثلا كتاب فى تربية الاطفال.مش دى حلجة من اهتماماتك؟
وتقومى عاملة مدونة جديدة وتسميها باسم الكتاب أو حاجة تخص موضوعه.
وتخلى المدونة دى مخصوص ليومياتك مع الكتاب ومع اللى قريتيه فيه.
وكدة انا هاجى ازورك مرتين.
مرة اشوف اخبارك ايه بصفة عامة فى الحياة كلها زى ما بيحصل دلوقتى عادى.
ومرة تانية هاشوف ايه اخبار اللى انت بتقريه وايه اللى استفديه واستفيد منه معاكى لما نناقشه سوا.
ونا نفسى دى تبقى عادة يعنى كل واحد مننا ليه مدونتين واحدة اسمها "عامل ايه دلوقتى" والتانية اسمها " بتقرا ايه دلوقتى"
مستنى أعرف الفكرة الجديدة وتحياتى لوالد حضرتك والسيد هانى والسيد شريف.

ملهمى العزيز.... عود احمد

سعيد جدا بسرعة التواصل معاك.
وبحب بجد اختلاف وجهات النظر لانه بيكمل الرؤيا انت من وجهة وانا من وجه ونقرب المفاهيم لبعض.
بس المرة دى ده مش إختلاف ولا حاجة أنا حاسس إنك ما أدركتش وجه النظر كاملة والسبب إختيارى لرأس الموضوع وسلسلة For Dummies بس أنا مقصدتش ان احنا نألف كتب انا قصدت ان احنا نتابع قراءات بعض ع مدونة مخصوصة كل اللى انت بتعلنه فيها يا جماعة انا بقرا كتاب كذا و فهمت منه كذا ووصلت لحد الباب الفلانى او الصفحة الفلانية.
ونتناقش فى المدونة التانية فى موضوع واحد بعينه ويبقالها رابط فى المدونة الاصلية. أما موضوع اللغة فده حاجة اختيارية يعنى أنا فيه مواضيع بكتبها فصحى ومواضيع عامية وحضرتك كدة برضه يعنى حسب الجاذبية بتاعتك والبلاغة ما إحنا عمالين نتكلم عامية من الصبح اهه
غير كدة انا افتكرت دلوقت الشيخ الشعراوى والدكتور مصطفى محمود كانوا بيكلمونا بالعامية ويعلمونا ارقى العلوم.
أنا باستمد الأفكار البناءة من كلامك الجميل
يا راجل ده انا كنت هاطفش من التدوين قبل ما أقابلك.
ربنا ما يحرمناش منك ابد.

محبة الخير
nonoymm
أنا طبعا متأكد إن حضرتك عندك استعداد للمشاركة.
وكويس إنك محتاجة تفكير دقيق لأنك كدة بتعدى الأعداد الصح علشان يكون أدائك أفيد.
كل ما فى الامر إنك هاتعملى مدونة تعلنى فيها انك هاتبدئى قراءة الكتاب الفلانى والله المستعان.
وبعد كدة تفتحى الكتاب وتقرى وتسألى وتتطقسى ده لو الموضوع يعنى صعب عليكى وبعد كدة ترجعى للمدونة وتقولى اللى انت قريتيه.
وانا كده هازورك تلات مرات مرة ازور عاشقة النقاب واتابع خوطرك.
ومرة للاستفادة من الى الهدى والجديد فيه
أما المرة التالتة هاجى اشوف الكتاب اللى انت بتقريه.


تعليقاتكم حمستنى اكتر و قريب هاكتب تدوينة تانى فى نفس الموضوع.

تحياتى لكم جميعا والسلام عليكمورحمة الله

Ahmed Kamal يقول...

بالعكس أنا معاك ، و شايف إن الفكرة جميلة ، لكن مش بالعامية ، علشان اللي يتكتب مايفقدش معناه بمرور الوقت ، و تبقى قراءته صعبة . ده غير إننا لازم نحافظ على لغتنا الأصلية و نشجع على استعمالها .

و عموما مش حانختلف :)

Mostafa Abdelmoneam Badr يقول...

ملهمى
احمد بك كمال
جميل جدا كلامك هو نسبة الاختلاف بسيطة جدا بيننا لكن الفكرة الأساسية متفقين وزى الفل
طيب ايه نبتدى ازاى
أنا منتظر منك نصايح مفيدة للموضوع ده وكمان عاوزك تزور مدونة ذلك الكتاب اللى باتكلم فيها عن تفسير ابن كثير وتقوللى رأيك.
فى انتظار ردك
مع تحياتى

لست منكم ؟؟؟ بل منهم ؟؟؟؟؟ يقول...

بص لو قصدك نبسط الكتب دى لبعض
عشان نفهمها ونستفيد منها
انا موافق

Mostafa Abdelmoneam Badr يقول...

لست منكم؟؟؟ بل منهم؟؟؟؟؟
بص هو ده قصدى بالضبط
وأنا بدأت بمدونة ذلك الكتاب فى شرح تفسير ابن كثير زورها ويا ريت لو عاجباك الفكرة وناوى تبدأ
تعرفنى علشان أضيفك فى هذا الموضوع
سعدت جدا بزيارتك
واتمنى من الله ان نصبح كلنا منهم

لست منكم ؟؟؟ بل منهم ؟؟؟؟؟ يقول...

انا سعيد جدا بيك
فعلا التفسير اللى انت كتبته جميل جدا
الفكرة عجبتنى
على فكرة انا لسه اول مرة بشارك
ومش عارف ابدا بايه
فى حجات كتير بفكر فيها بس مش عارف ارتب افكارى

وان شاء الله كلنا منهم