الثلاثاء، أبريل 29

مين اللى ليكى

مين اللى ليكى وكلنا طمعانين ف العطف.
من خيرك ومن نيلك ياللى عدوا زماان مداينك الف.
وظالمينك يا غالية ولادك المساكين من كل صنف وصنف.
بيحرقوا فيكى من غلبهم ياناس ويولعوا بايدهم رغم اعتراض الكف.
سكت اللسان واتخرس ماقدرتش انطق حرف.
مين اللى ليكى وكلنا طمعانين فيكى .
مين اللى ليكى وكلنا طمعانين ف العطف.
من كام سنة فاتت كنا يا خلق رجال.
وقفنا مع بعضنا ف الشدة كالابطال.
بنينا سد الكرامة وضربنا اعظم مثال.
وربطنا على بطننا بالذكر والابتهال.
أمم زعيمنا القناة قلنا معاك يا جمال.
هجموا علينا الاعادى ودببحوا فينا.
تلات وحوش مفترية جم ينهشوا فينا.
ومصر كانت بتدعى يا مغيث غيثنا.
ياحق ياعدل من دة الظلم خلصنا.
ندهت علينا بحس الهمة يا اولادى.
مين اللى ليا قلنا بروحنا نفديكى.
مين اللى ليكى وكلنا طمعانين فى العطف.
مين اللى ليكى وكلنا طمعانين فيكى.
بدأ الكفاح بعدها همة يا رجالة.
عدم انحياز كلنا دة المنحازين عالة.
ع الجبنا والاوباش والشبه رجالة.
وده طبع مش طبعنا فيه خسة وندالة.
ابدأ صناعتك يا ريس وكلنا وياك.
حررنا بايدينا من قبضة الملاك.
لو كوريا فيها دايو النصر بينا معاك.
وعندهم سامسونج تليمصر اسمى مناك.
يا حرة يابلادى بالاقتصاد الحر.
احنا بدانا العمل بكرة السنين هاتمر.
وتعبنا راح نحصده بالفرحة فى عينيكى.
مين اللى ليكى وكلنا طمعانين ف العطف.
مين اللى ليكى وكلنا طمعانين فيكى.
الفتنة نار والنار راح تاكل الاخضر.
طول ما العدا مستطار والشر بيمطر.
قالوا اضربوهم بالبندقية لأ من غير سلاح اشطر.
نسسوهم اللى بنوه ووقعوا بينهم.
وفرقوا دمهم خلوا الخلاف دينهم.
خلوا عاليهم واطيهم وغيروا المعنى.
يبقى كلام مصطفى او سعد بلا معنى.
يبقى السادات خاين ويجوز فى حقه القتل.
محفوظ ومات كافر وزويل ده عالم ندل.
وغرقوهم فى بحر الكيف وظلماته.
عبوا القلوب بالحقد يمحى الحب من ذاته.
يا مصر ضيعى وجوعى وقولى مين ليكى.
ومين يجاوبك ولو أدنت كالديكى؟
مين خاف عليكى وكلنا مطحونين م الغلب.
احنا انهزمنا وبقينا طمعانين فيكى.

هناك 8 تعليقات:

بنت الصالحين يقول...

ماشاء الله
بجد حضرتك شاعر
نسميك كبير الشعراء

ربنا يكرمك ويوفقك

تدوينه هايله

Dr. Ibrahim يقول...

تقول إيه على اللى خربها وقعد على تلها واللى مسكهاوسرق منها قوت الشعب الغلبان
وحسبى الله ونعم الوكيل

د/هيما

Eman Eltaher يقول...

القصيدة جميلة جدا و بالذات البداية بتاعتها مش معقولة بجد

وانا من النادر انى أندمج ف شعر
حتى الشعر بتاعى - أه والله بكتب شعر !! - ساعات كتير مش بندمج فيه كده

انت كده هتخلينى أقول ايه اللى انا بكتبه ده ؟؟!!!!
هههههههه
بس بجد ان شاء الله يكون لك مستقبل مشرق و تتعرف كشاعر كبير
و انا سعيدة انك اديتنى الفرصة انى أتعرف على مدونتك

تحياتى ليك

Mostafa Abdelmoneam Badr يقول...

عاشقة الفردوس
متشكر جدا على مرور حضرتك الجميل
وكبير الشعرااااء دى كبيرة قوى
ربنايقبل منك ويا رب يكون فى الخير
اتمنى لك ان تنولى من الله ما تعشقين

د/هيما
انت جاى تعالجنا ولا تزود همومنا
عماااار يا مصر وتلك عالى محدش يجيب سقفه
بس احنا اللى مقصرين فى حق نفسنا مش فى حقك يا عالية لفوق.
التاريخ مش هايتكلم عننا علشان احنا ما عملناش حاجة لكن مصر انت عارفها فى كل العصور.مصر هى مصر بس احنا احنا

ايمان الطاهر
هو انتى بتعرفى تكتبى حجات تفرح ولا انتى بجد حاجة تفرح.
انا اهنيكى على كلامك اللى بيوصل مطرح ماهو عاوز.
فعلا اسعدتينى
ربنا يبارك فيكى

عاشــــــ النقاب ـقــــة"نونو" يقول...

السلام عليكم
تدوينة معبرة اوي ومرة بطعم الحنضل لكنها صحيحة مليون بالمية
طلتك على مدونتي زادتني شرف واتمنى دوام التواصل
تحياتي

Ahmed Kamal يقول...

لك أسلوب مميز في التعبير عن أفكارك ، لو قدرت تصيغ أي موضوع بنفس الحرفية تبقى فعلا شاعر و كمان ممكن تتعرف من قراءة شعرك .

مش عارف ليه عندي إحساس إن فكرة "مين اللي ليكي" كانت عندك من زمان و فضلت تفكر فيها و تصيغها لحد ما وضعتها هنا . هل إحساسي ده صحيح ؟

Mostafa Abdelmoneam Badr يقول...

nonoymm
رأيك أسعدنى جدا خاصة اذا كان للتدوينة تأثير. يعنى لو فعلا مرةبطعم الحنضل نحاول بجد نحلى الواقع من خلال تفكير ايجابى.وسعى حقيقى.
طلتى على مدونتك زادنى انا شرف.
انا فخور جدا بكلامك عن سيدنا نوح.
انت بتتأملى فى ايه؟ فى القرآن!
ده انتى كدة من العظماء اللى ممكن يغيروا التاريخ.
تقبلى تحياتى.

احمد كمال
او ملهمى زى ما أنا عينتك فى مدونتى
يا رب تتقبل الوظيفةوتستمر فى اشعال مشاعر الايجابية عند زوار مدونتك.
فعلا مدونتك مفيدة مغيرة مؤثرة.
على فكرة
فكرة مين اللى ليكى عايشة جوايا
وبحاول اعبر عنها من زمان بطرق مختلفة
وبالتحاور مع الناس اللى عايشين معايا. ولكن القصيدة بتتكتب فعلا فى لحظة واحدة.
زى ما بيقولوا الوحى نزل.
اللى بيحصل بالضبط ان المشاعر بتلتهب ناحية موضوع. والتأثر بيوصل لدرجة معقولة.فتلاقى الافكار المكبوتة فى المشاعر تتفجر فى صيغة حسية عالية.وتحس كأن المفاتيح بتاعة الكى بورد شغالة لوحدها وعارفة هى رايحة فين.آلية غريبة حضرتك خليتنى اتأملها.وموضوع محتاج يتكتب فى تدوينة لوحده لانه عجبنى فعلا.وهو احنا بنكتب الكلام الحلو متى وكيف؟ اصل الكلام الحلو بيندفع من الداخل من غير تفكير والتفكير بيكون سبقه يمكن بسنين او ايام او شهور او حتى لحظات. بس ساعة الكتابة بيكون فيه نضج كامل للاحساس وفقط اندفاع التعبير للخارج.اللى بيسموه الوحى. وهو كدة يبقى وحى داخلى.
عايز اكمل كلام مع حضرتك بس ما فيش مجال
شوف انت بتلهمنى ازاى؟
ربنا يبارك فيك

Mostafa Gamal يقول...

أكثر من رائع .... و نرجو الاستمرار