السبت، أغسطس 23

تفاصيل العلاقة

كلنا بشر.
ومحتاجين لبعض علشان حاجات كتير.
ومواقف كتير لازم نقف فيها مع بعض.
ودى حاجة كلنا عارفينها.
ولمزيد من الاحكام.
كوووولنا حاسينها.
يعنى ربنا خلق جوانا من ضمن احاسيسنا.
احساس الأنس والوحشة.
علشان يخلق بيه الطبيعة الاجتماعية للبشر.
أصل أى حاجة بنعملها لازم يكون وراها دافع حسى قوى.
ومن ضمن الدوافع حب الأنس وبغض الوحشة.

طب ما تيجوا نفنط العلاقات بين البشر.
احنا محتاجين ايه غير أب وأم وأخ وأخت وابن وإبنة وزوج وزوجة.
فيه حاجة تانية؟
قبل ما تقول آه فيه وأقولك عارف.
نفسر دول الأول.
لأن دول لب العلاقات الإنسانية كلها.

وكل واحد من دول قبل ما يكون عاوز ياخد لأ ده عاوز يدى.
ومحتاج للعطاء زى ما هو محتاج للأخذ.

الأب والأم عاوزين يدوا الحنان والرأفة واللين والشفقة والنصيحة كل بطريقته مع اختلاف جنسه.
الإبن والإبنة محتاجين يدوا البر والإحسان والرضا والامتنان كل بطريقته مع اختلاف جنسه.
الأخ والأخت محتاجين يدوا لبعض القوة والألفة والتفاهم والبهجة كل بطريقته مع اختلاف جنسه.
الزوج والزوجة عاوزين يدوا الراحة والأمان والسعادة والإستقرار كل بطريقته مع إختلاف جنسه.

طيب لو جينا نتكلم عن الجد والجدة والخال والخالة والعم والعمة هنلاقيهم آباء أقل درجة وأحيانا كثيرة أكثر كثيرا.
ولو حكينا يا حبيبى عن الحفيد والحفيدة وابن وبنت الأخ أو الأخت هنلاقيهم أبناء أقل درجة وساعات والله العظيم أكتر.
أما ابن وبنت العم وابن وبنت الخال فخلينا نأجل الكلام ييجى اربع دقايق.

يعنى هى دى كل العلاقات الإنسانية؟
أبدا
فيه بعد كدة الخليل يا صاحبى.
وده إنت بتختاره على قدر احتياجك لنفس العلاقات السابقة.

يعنى فيه صاحب زى الأب.
وفيه صاحبة زى الأم.
وبالتبادل فيه صاحب زى الابن وصاحبة زى البنت.
وفيه صاحب زى الأخ وصاحبة زى الأخت.

والسؤال الصعب مين بقى زى الزوج وزى الزوجة؟؟؟؟؟

ماهو الزوج والزوجة مختلفين فى الجنس وده لا بد منه.
يبقى لما واحد رجالى يبقاله صاحب حريمى بيكونوا زى الأخوات؟!
طب ازاى ما هى العلاقات الإنسانية فيها حاجة للعطاء بلا حدود.
يعنى طول ما بإمكانى العطاء فلا أمنعه إلا إذا منعتنى الموانع.
والعلاقة بين الأخ والأخت محدودة ثقافيا ووراثيا واجتماعيا.
يعنى زيها زى علاقة الأخ بالأخ أو زى علاقة الأخت بالأخت.

وحتى لو فيه مجتمع كبير أو صغير فقد الموروثات الثقافية دى.
وخطر على بال الواد إن أخته زى مراته تبقى وقعة هباب وبتحصل.

نرجع لولاد العم والعمة والخال والخالة وبناتهم.
فدول برده بيترددوا حسب المجتمع والنشأة.
يعنى لو متربيين فى بيت واحد وبياكلوا من طبق واحد هايبقى صعب قوى إنه يفكر يتجوز بنت عمه دى ولا بنت خاله وهى صعب تفكر فيه برده.
لكن مش مستحيل.
وأنا ما بتكلمش عن الجنس أنا باتكلم عن الأنس والفرق بين العلاقات الإجتماعية للبنى آدم.
يعنى طول ما الشخص عارف إنها ممكن تكون زوجته فهو ممكن يحن ليها بالصورة دى ويعترف من جواه إنها مش أخته.

طيب نرجع للصحابعلشان نخلص الموضوع .
هى لسة صاحبتى زى أختى؟
طبعا لأ لأن عندها من العطاء ما لا تستطيع الأخت أن تصرفه لى.
وهى بطبعها البشرى محتاجة تدى العطاء ده وكمان العطاء ده لا يصلح لأخيها.
فلازم تديه لصاحبها.
ومن غير ما أطول عليكم هانقول العكس بالعكس يعنى الراجل محتاج يدى عطاء لا يستطيع صرفه لأخته.

يبقى قل صاحبتى زى مراتى.
ولا تقل صاحبتى زى أختى.
وقولى صاحبى زى جوزى .
ولا تقولى صاحبى زى أخويا.


يعنى هو لو اتنين إخوات فى كلية واحدة والواد مدبلر واخته محصلاه ما بنشفهمش قاعدين مع بعض ليه تحت الشجر يا وهيباااا؟؟
علشان لاهو زى جوزها ولا هى زى مراته.

مش كدة ولا إيييييه.

هناك 48 تعليقًا:

كلام على بلاطة يقول...

ايه يا عم الحلاوة دى
تحياتى

على عبدالله يقول...

يا خسارة مالحقتش اول تعليق

بس بصراحة

انت ليك اسلوب جميل جدا وربنا يباركلك

خالص تحياتى
السلام عليكم ورحمة الله

Ahmed Kamal يقول...

عندك حق طبعا ، و مهما ضحكنا على نفسنا هي كده ..

لكن بعيدا عما ذكرت من علاقات ، و خلينا نسميها العلاقات الأساسية ، فبرضه في علاقات تانية تتعلق بالمصالح زي الزمالة في الدراسة أو العمل ، و زي العلاقات التجارية أو الخدمية ، و هي تتعلق بتوافق الأهداف و الظروف بين شخصين مش بتربطهم أساسا علاقات تانية ، و لو قلنا إن العلاقة دي لابد أن تكون تطور للعلاقات الأساسية نبقى غلطانين ، لأني لا أعتبر الراجل اللي مأجر لي الشقة مثلا بمثابة أب أو أخ ، و كذلك البقال ، و برضه الجنايني ، أو حتى موظف مصلحة المرور ، و هكذا ، و أعتقد اختلاف الجنس هنا لا يحدد نوع العلاقة ، بقدر ما يحدد أسلوب التعامل اللي بتفرضه قواعد المجتمع .

نيجي بقى لنوع تاني ، و هو العلاقات الفكرية ، فمثلا علاقة الكاتب بالقارئ ، أو العالم بطالب العلم ، أو الممثل بالجمهور مختلفة ، و إن كانت موجودة ، و كذلك ارتباطي بمدون آخر لا يمكن ان أرده إلى أحد العلاقات الأساسية ، إلا إذا كنت مفتقد هذه العلاقة ، و هو مستعد لتطوير العلاقة ، بما يخرجها من مجال العلاقة الفكرية أيضا ، لتصبح صداقة مثلا .

في برضه علاقات أخرى مثل الجيرة ، هل هي علاقة مصلحة ، أم علاقة أساسية ؟

واضح إن انت اللي بقيت ملهم يا مصطفى ، و خليتني أرغي كتير قوي :)

تقبل تحياتي

ahmed_k يقول...

ههههههههههههههههه
هو كده تمام يا درش
بصراحه تقييمك للعلاقات البشريه
كان رائع
ووضح أو أخرج من جوانا
أصل كل علاقه و منتهى الذي يريده كل طرف علاقه من الطرف الآخر

بصراحه
كل ما تكتبه جميل ورائع
ربنا يزيدك من العلم والعقل

وأتمنى أن يأتي اليوم الذي نجتمع فيه
أخوة واحبة في الله

وتقبل خالص تحياتي

في أمان الله

عالم حبيب يقول...

السلام عليكم ورحمة الله وبركاته

تحليل جميل للعلاقات إلى أن وصلت إلى الهدف الرئيسي وهي أن صاحبة البني آدم - لو صح اننا نقول ان في صحوبية - مش زي أخته .. مش نفس علاقة البراءة بين الأخ وأخته

جزاك الله خير على التدوينة الجميلة دي ياجميل

عصفور المدينة يقول...

صح صح صح
وقد قرأت كلاما شبيها بهذا لشيخ الإسلام بن تيمية منذ زمن

فيما عدا انتقالتك إلى العلاقات بين الجنسين بارك الله في عقلك

Mostafa Abdelmoneam Badr يقول...

كلام على بلاطة

دى حلاوتك يا حضرة الناظر.
منتظرين جديد منك دايما.

تقبل تحياتى

Mostafa Abdelmoneam Badr يقول...

علوة حبيب قلبى

مش مهم أول وتانى
المهم ان تعليقك جميل وذوق وبيفرحنى

ربنا يبارك فيك

تقبل تحياتى

Mostafa Abdelmoneam Badr يقول...

احمد كمال

اشكرك على التصنيف الذى اثرى الموضوع.
هو أنا كلامى منصب على العلاقات العاطفية أو العلاقات الإنسانية البحتة.
لكن فعلا معاك كل الحق فيه علاقات تانية فيها تبادل منفعة زى ما حضرتك صنفت من جيرة وزمالة عمل ودراسة وتعاملات تجارية وبرده العلاقات دى كلها ممكن تاخد شق عاطفى لو فيه توافق يعن الزملاء بيبقوا أصحاب زى الإخوات لو هما عاوزين والجار بيبقى صاحب زى الأخ أو الأب أو الإبن
وكذلك المعلم بيصاحب تلميذه والمفكر بيصاحب من قراءه. وبتتحول العلاقة من صورتها الاساسية الى صورة عاطفية بحتة هدفها العطاء الحسى العاطفى الأبوى أو الأخوى أو الأمى أو الزوجى.
لكن إحنا لتجميل شكل العلاقة بنقول عليه أخوى وبنقنع نفسنا بكدة.

الجيرة برده علاقة تبادل منفعة يعنى مش شرط تصاحب جارك ولا تصرف له حب كإنسان بس المهم لا تإذينى ولا أأذيك. لكن حضرة النبى صلى الله عليه وسلم وصانا بالجار فريضة حتى ظن الصحابة إنه سيورثه.أى حثهم ونحن على صرف المشاعر العاطفية للجار وحب الجار كأخ أو ابن أو أب.

لااا إنت هاتفضل طول عمرك ملهم
وأنا اللى رغاى وستين رغاى

تقبل تحياتى الغالية

Mostafa Abdelmoneam Badr يقول...

Ahmed_K

لو تعرف قيمة تمام بتاعتك دى عندى
أنا باستمد الثقة والفخر من آرائك أنت وبعض المدونين الذين أحترم آرائهم كثير.

فأنا أشعر بقيمة ما أكتب من خلال تعليقاتكم الجميلة واستجاباتكم.

وإت شاء الله ربنا يجمعنا ونلتقى على خير قريبا.

مع أغلى تحياتى

Mostafa Abdelmoneam Badr يقول...

حبيب الحبيب

فعلا زى ما حضرتك قلت.
وكمان أنا يا اخويا ماليش دعوة بريئة مش بريئة.المهم إننا نحط النقط ع الحروف وما نقولش اخوات.لإن العلاقة فعلا أكبر من كدة.وحجم العطاء المتبادل أكبر بكتيير من أخ وأخت.فعلا الواحد المذكر محتاج جدا جدا لواحدة مؤنث.ودى حاجة لا بد منها لو عنده 100أخت.ما حدش يقدر يقول غير كدة.وعلشان كدة حضرة النبى صلى الله عليه وسلم قال "ثالثهم الشيطان".

تقبل تحياتى الحبيبة

Mostafa Abdelmoneam Badr يقول...

عصفور المدينة

وصقرها الحامى ومهندس مدونيها
نحبك ملء قلوبنا عن بعد وقبل القرب والتعارف.فماذا لو رأيناك وقابلناك.

ثلاثة صح كتيير جدا
وكمان تشبيه بكلام مفكر راقى ومجدد

ده أنا اللى عصفور الدنيا كلها
أنا طير فى السما على رأى البحر درويش

بارك الله لنا فى كلك

مع أغلى تحياتى

Unknown يقول...

السلام عليكم
العلاقات الانسانية متشعبة ولا تقتصر زى ما حضرتك قلت على العائلة وصلة الرحم والدم هناك علاقة الانسان مع الانسان الاخر وان اختلف جنسة
وذلك للميل الطبيعى او بحكم المشاركة فى نفس المجتمع
لكن وصفك حلو وسلس
تحياتى
رمضان كريم

مشتاق لله يقول...

كلنا بشر.

ومحتاجين لبعض علشان حاجات كتير

Mostafa Abdelmoneam Badr يقول...

نهر الحب

وَلَوْلا دَفْعُ اللَّهِ النَّاسَ بَعْضَهُمْ بِبَعْضٍ لَفَسَدَتِ الْأَرْضُ وَلَكِنَّ اللَّهَ ذُو فَضْلٍ عَلَى العَالَمِينَ
صدق الله العظيم

بلغك الله رمضان وأنت فى أحسن حال
كل سنة وانت طيبة

تقبلى أغلى تحياتى

Mostafa Abdelmoneam Badr يقول...

مشتاق لله

يا أيها الناس إنا خلقناكم من ذكر وأنثى وجعلناكم شعوبا وقبائل لتعارفوا
إن اكرمكم عند الله اتقاكم.

صدق الله العظيم

طولت الغياب فصرت أنا مشتاق لك لله.
حمد الله ع السلامة

تقبل أجل التحيات

جنّي يقول...

السلام عليكم

مش كده ولا ايه ؟

هو كده بالضبط

والدليل ان القرآن ذكر كلمة صاحبة على انها الزوجة وليست الأخت

{بَدِيعُ السَّمَاوَاتِ وَالأَرْضِ أَنَّى يَكُونُ لَهُ وَلَدٌ وَلَمْ تَكُن لَّهُ صَاحِبَةٌ وَخَلَقَ كُلَّ شَيْءٍ وهُوَ بِكُلِّ شَيْءٍ عَلِيمٌ }الأنعام101
وهناك مواضع اخرى ايضا

شكرا

Unknown يقول...

السلام عليكم ورحمة الله وبركاته
مع اصرارى
وعزمى وتصميمى
ايه ياعمُنا(التفصيصة)دى
حلوة اوى بس بصراحة
جيت فى الاخر واتلخبطت
من اخويا ومين ابويا
لكن اللى اقدر اقوله
انا فيه متفردات ومتشابهات
فى العلاقات الانسانية بمعنى فى جزئية من الصداقة بتبقى زى الاخوة والعكس صحيح
وبرضه زى الابوة او الامومة (وبصرف النظر عن إن كان فيه فارق سنى ولا لأ)
العلاقات الانسانية متشعبة ومتشابكة
وكذلك النفس البشرية اكثر تشعبآ.
وتشكراتى وتحياتى .

☼♫♪ عمــاد الدين يــوسف ☼♫♪ يقول...

البشر هم البشر
ليــت الكلمات تجدي نفعا . كنت نفسي نوما لا عيش عمري في يقظة الكلمات
تحياتي
وتقبل دعوتي لزيارة مدونتي المتواضعه

Mostafa Abdelmoneam Badr يقول...

جنى
بسم الله الرحمن الرحيم

أيوة كدة يا راجل هل وطل ونور المدونات
بآرائك وخفة دمك.

أفادك الله من بحور علومه التى لاتنفد

تقبل تحياتى

Mostafa Abdelmoneam Badr يقول...

نوراهاتى

أنا أخوكى
أخوكى مصطفى
فخور بيكى جدا وبآرائك التدوينية
وسعيد جدا بكتاباتك وتعليقاتك

تقبلى تحياتى دائما نور

Empress appy يقول...

بس المفروض احنا فى مجتمع مترابط المفروض يعنى
المشكله فينا احنا مش بنعرف نقيم العلاقات او نحدد اطارتها

شكرا ليك بجد على الموضوع

Mostafa Abdelmoneam Badr يقول...

آبى
الكوكب المضييييئ
آه يا كسوفى يانى

بالضبط كدة إحنا بيخوننا تقييم العلاقات وإختلاف مسمياتها ومش بس العلاقات دى المسميات دى مشكلة كبيرة.

ممكن حاجة تكون مش صح ونديلها اسم حلو بس على غير مسماها الحقيقى

علشان كدة أنا كتبت المقال ده مخصوص علشان ألفت النظر لمعنى الصداقة بين راجل وست.

ما ينفعشى العلاقة تخرج من إطار الزمالة لان الصداقة بين الجنسين عمرها ما هاتكون أخوة لأنها أكبر من كدة

الدنيا نورت

الـسـيـدة نـون يقول...

اه تصدق

بس ليه مانحطش فى اعتبارنا ان اصحابنا زى اخواتنا
وانه من المستحيل نديهم اكتر ما بندى اخواتنا


واساسا بقى
هنلف وندور ونقنن ونألف مسميات ونخترع فى كلمات

انا مش مقتنعة بالصداقة بين الواد والبت

انا خيخة اه
بس خيخة دقة قديمة
اصل الصداقة دى بين الواد والبت
بتتطور وبتبقى علاقة نوعا ما عاطفية

مابالك بقى بين واد متجوز وبت متجوزة
دى كدة هتدخل فى بند حاجات منيلة بستين نيلة


الموضوع ده عجبنى يا مصطفى

الا انت ماجتش يوم التبرع ليه

انا زعلانة منك على فكرة

سلام
اختك خيخة

أختكم فى الله يقول...

ما شاء الله لاقوة الا بالله

ايه الكلام الجميل ده كله

البوست رائع

يجنن

سبهللة يقول...

كدة وابو كدة وابصم على كلامك بالعشرة
لان زوجى الحالى كان اصلا صديقى ايام الكلية وكان اسرارنا مع بعض
لحد ما قلبت بحب وجواز وبيت وعيال..الخ
======
شلت لك اللعبة عشان رمضان
بس هاحطها بعد رمضان
اظن كدة عدانى العيب
=========
كل سنة وانت طيب
رمضان كريم

Mostafa Abdelmoneam Badr يقول...

البت السكر خوخة

قلت لك ميت مرة انت مش خيخة
انت دقة قديمة ماشى لكن خيخة لأ
وأنا كمان دقة قديمة لكن خيخة لأ

دقة حكيمة مصممة بإتقان وفهم مش رعونة وأى كلام

يا ساتر إنت لسة شايلة يوم التبرع فى قلبك وسراه ده انت قلبك غامق قوى

أنا أعتذرتلك عندك النهار ده تانى

تقبلى أسمى تحياتى وشريف وهانى
السلام عليكم ورحمة الله

Mostafa Abdelmoneam Badr يقول...

أختنا فى الله

إيه يا أسماء
هو بوست ولا فستان
يا ستى إتفضلى
ما يغلاش عليكى

كل سنة وانت طيبة
ويا رب أختك ترجع بالسلامة النهارده

مع خالص تحياتى

Mostafa Abdelmoneam Badr يقول...

سبهللة

وشهد شاهد من أهلها
أهى دى صداقة ناجحة والحمد لله مستمرة
صحوبية عجب

أخيرا شيلتى اللعبة
أنا كنت باحبها قوى علشان كدة عاوزك تشيليها
كنت قبل ما اكمل قراءة تدويناتك أفتح وأقعد ساعة ساعتين لما بهدلتنى
لعبة سبهللة خالص

كل سنة وانت طيبة
وربنا يفرحك بولادك فى الدنيا والآخرة
مع أرق التحيات

dodda يقول...

يا ابن الايه....
كل طبق طبقنا ده عشان عاوز برتقان؟؟؟
والا انت عايز وهيبه؟؟؟

انت عايز تقول انه لا يصح الا الصحيح
واننا بشر
كل واحد يحس على دمه وميتمحكش فى الاخوه
احييك
اللهم اهدنا واهد بنا
ادعى لشباب المسلمين طول رمضان بالهدايه
وللبنات بالازواج الصالحين
كل سنه وانت طيب وبألف خير

nigro يقول...

مصطفي بك
أول تعليق بعد سبعتلاف خمسمية و اتناشر زيارة
بص بقى يا درش
أنا بيعجبني قوي قوي قوي أسلوب "الفصح البائن في فضح المعنى الباطن"
يعني يا ريس
أنا متفق معاك تماما في تفنيطك ده
بل ده انا في عقل بالي و أنا باقرأ قلت -ولا مؤاخذة يعني- يا مصطفى يا ابن الإيه
بس أنا متفق مع نوران في كلامها تماما
تسلم دماغك يا مصطفى

كل عام و انت إلى الله أقرب و على طاعته أدوم
كل سنة و انت طيب يا مصطفى
بلغنا الله شهر رمضان الكريم و أعاننا على صيامه و قيامه على الوجه الذي يُرضيه عنا و أعاده علينا أعواماً عديدة و أزمنة مديدة و بلغنا فضل قيام ليلة القدر

كل سنة و انت بخير يا درش

يلا سلام
كل سنة و انت طيب

على عبدالله يقول...

كل سنة وانت طيب
مغفور ذنبك
تائب ،حامد، شاكر ،عابد ، عائد الى ربك

جعلك الله من العتقاء فى شهره الكريم ومن الفائزين فيه بجنات النعيم

نسالك اللهم ان تبلغنا رمضان
وان تتقبل منا فيه القيام والصيام والركوع والسجود وخالص الاعمال

كل سنة وانت طيب

Mostafa Abdelmoneam Badr يقول...

Dodda
يا عم أنا لا عايز برتكان ولا عايز وهيبة. أنا مش عايز غير الشجر.

وعاوز مانحرمش من زيارتك الجميلة.

كل سنة وإنت طيبة.
وكل رمضان وإنت أسعد وأهنأ بحب الله ورسوله صلى الله عليه وسلم

لكى أغلى التحيات

Mostafa Abdelmoneam Badr يقول...

ňįĝŗő
يا راجل
بقى تعلقنى سبعتلاف خمسمية واتناشر مرة علشان تعلق فى المرة السبعتلاف خمسمية وتلاتاشر.

بس أنا والله من زمن نفسى فيك ومستنيك وكملت فرحتى مع هلال رمضان

كل سنة وانت بألف خير.
وأيامك هنا وتحقق أحلامك.

ربنا ما يحرمناش من بعض أبدا
تقبل أغلى تحياتى

Mostafa Abdelmoneam Badr يقول...

على عبد الله

دايما سياق بالخير وقلبك كبير يا حاج على
وحاج دى أمنية ليك ودعوة منى ربنا يحققهالك السنادى بأمره ورحمته.

وترجعلنا بألف سلامة ومصر تنور بيك.

رمضان كريم
وكل سنة وانت طيب.

خمسة فضفضة يقول...

السلام عليكم ورحمة الله وبركاته

ايوه طبعا كده

وللاسف بتحصل مشاكل كتير اوي بسبب الخلط في مفهوم العلاقه بين الاتنين

و مستحيل الاخت تبقي زي الزوجة او الزميله

كل سنة وانت طيب

bastokka طهقانة يقول...

اللهم بلغنا رمضان و اعنا على صيامه و قيامه و اجعلنا من عتقائك من النار في هذا الشهر الفضيل
امين
أختكم
عبير عبد الشافي صاحبة مدونة طهقانة و كلبوزة لكن سمباتيك

Mostafa Abdelmoneam Badr يقول...

خمسة فضفضة

لا والله كلامك عاجبنى بجد
وفضفضتك تتحسدى عليها هنا وفى مدونتك كمان
يمكن الخمسة دى علشان الحسد؟
أصل بجد خمسة مش كفاية
إنت عاوزة تسعين دقيقة فضفضة

تقبلى تحياتى

Mostafa Abdelmoneam Badr يقول...

bastokka طهقانة
شكرا لعبير قلمك الشافى
مش عارف طهقانة إزاى؟
مع إنك كلبوظة الإبداعات وسمباتيك المعانى.
ده إحنا اللى طهقانين من غيرك

تقبلى تحياتى

Mostafa Abdelmoneam Badr يقول...

المحرر الصحفي والشاعر : عمــاد الدين يوســـف

آسف لتأخرى عليك
ومرحبا بك

لكن بصراحة
عقّدتنى يا راجل

هو احنا فاضل لنا غير يقظة الكلمات

ياعم أنا عاوزك تسيبنى أعيش ولما تيجى تزورنى تقول: "إنت اللى هاتغنى يا منعم"

إنتظر زياراتى و
تقبل تحياتى

انا مش معاهم يقول...

كل سنه وانتم الي الله اقرب
رمضان كريم
اخوكم سيف الاسلام

Unknown يقول...

السلام عليكم ورحمة الله وبركاته
مع اصرارى
وعزمى وتصميمى
اين الجديد؟
نعلم رمضان والصيام
وصلاةالقيام وقراءة القرآن
لكنى ايضآ اسألك :)
(تلامة بقى!!)
اين الجديد؟
كل سنة وانت
والاسرة الكريمة
بألف الف خير.

Mostafa Abdelmoneam Badr يقول...

سيف الإسلام

كل سنة وانت طيب
ونورت المدونة

مع أرق تحياتى

Mostafa Abdelmoneam Badr يقول...

نوراهاتى

آلمنى كثيرا ما بين القوسين
ولو كان من غيرك لآلمته
فلا تؤلمينى
بل أنت نور خافت
مبهج إشراقه
مفرح اطلاله
وقور فى جوهره
بهى فى مظهره
ما علمناه منه كفانا
وما خفى كان أجمل
بهية نقية تقية
ذاكرة مذكِّرة غنية
عفيفة مطهرة قوية
وقد زادت علومى عنك علما
بكونك للأخلاّء وفية
ولا أملك لعمرك غير أملا
من الرحمن أن تبقى هنية
ويرضينى سرورا وابتهاجا
قبولك من فقير ها التحية

سلام الله دوما يحتويكى
ورحمته وبركات عليه

Unknown يقول...

السلام عليكم ورحمةالله وبركاته
الأستاذمصطفى
مع اصرارى
وعزمى وتصميمى
كما اقول ان العمل والتعامل مع البشر كل يوم من جميع الاعمار والثقافات وقبل هذا الكلمات المتقاطعة والمسلسلات والافلام كل هذا
ترك لىّ حصيلة من الكلام والردود معها لا يعجزنى الرد على اى سؤال او كلمات توجه الىّ الا فيما ندر كما انا الان
لا اجد الا شكرآآآآآآآآآآآآآآآآآآ
شكرآآآآآآآآآآآآآآآآآآآآآآآآآآآآ
شكرآآآآآآآآآآآآآآآآآآآآآآآآآآآ
ياأستاذ مصطفى وادعو الله الا يدخل عليك الا السرور ويقر عينيك باولادك ويكمل لك اسباب رضاه دنيا ودين بأذنه
تعالى .كا استأذن فى وضع رابط لكلامك هذا بل ووضعه فى مدونتى إذا سمحت لىّ.
مرة اخرى تقبل تحياتى وشكرى ودعواتى
بدوام الصحة والعافية والرضا بما قسم الله لك فى كل شىء فأنا (واعوذ بالله من قول انا) ارى الرضا بالمقسوم هو السعادة الحقيقية.تقبل تحياتى.

بيكيا للبيع يقول...

يوم السبت 13 سبتمبر
معادنا اننا نزور الاطفال المرضى
تحب تشارك معنا ؟
لو تحب تشارك زورنا هنا

http://kouskoza7.blogspot.com/

http://bekyaforsale.blogspot.com/

هانى زينهم يقول...
أزال المؤلف هذا التعليق.
هانى زينهم يقول...

جميل المقياس ده يا استاذ مصطفى للعلاقات الانسانية . بس من امتى والعلاقات الانسانية بتخضع لمقاييس ؟؟
مش فى اتنين اخوات ممكن يقتلوا بعض وفى اتنين اصحاب ممكن يموتوا مكان بعض . وممكن اب يموت نفسه عشان عياله واب بيرمى عياله من غير حتى تانيب للضمير . مش احيانا تحب حد من مجرد نظرة وتكره حد عاشرته العمر كله .
مش احيانا تعرف واحدة وتعتبرها صديقة واقرب ليك من اى حد وممكن تحكيلها كمان على عاطفياتك كانها اختك وبعدين الشعور ده يتغير جواك واحدة واحدة لغاية ما تحبها وتتقدملها وتتجوزها لانها فى النهاية مش اختك .
اعتقد ان التفنيط ده مش مجاله العلاقات الانسانية اللى بتختلف من حد لحد ومن بيئة لبيئة ومن اخ لاخوه .
يبقى نقول العلاقات الانسانية المفروض تكون كدة ولا نقل ان العلاقات الانسانية هى كدة .
عموما انا سعيد بالتعرف على مدونتك وسعيد اكتر باسلوب حضرتك فى عرض المواضيع وتقبل مرورى وتحياتى