الجمعة، أكتوبر 21

أنا إبنك

أنا إبنك
وحاسس بيكى جوايا 
كأنك حملى وجنينى
وساعة الوهن تضنينى
تصبرنى
 أمانى ميلادك اللى جاى
وتحيينى


أنا إبنك
عبدت الحق على دينك
وعشت العمر فى سنينك
ولحم كتافى من طينك
لا عندى قيراط فى فدادينك
ولا مصيت فى يوم دمك


أنا إبنك
أنا التايه فى أراضيكى
بادوَّر ع الأمان فيكى
حلمت أوصل وأعديكى
ومات الحلم قدامى


صلبت الحلم فى عنيكى
 رفعت صليبى لحظة فجر كل أدان
حلفت بدمى لأفديكى 
وأمحى من تاريخك سطر كله هوان


يا عالية مهما وطى فيكى كل جبان
يا غالية ومستبدة وطاغية فى الوجدان
أنا ابن شهيد وجدى شهيد
وبكرة نزيفى من دمك


أنا إبنك


أنا اديتك
قوليلي خدت إيه منك
ومش عايز
لكن عايزك



هناك 7 تعليقات:

Unknown يقول...

الله يااستاذ مصطفى
واعذرنى للسؤال هل
هى من نظمك؟أم لشخص أخر؟
فى الحالتين لا أختلاف على
حلوة الكلمات وصدق الأحساس

Mostafa Abdelmoneam Badr يقول...

منوووورة يا دكتورة
هى من نظمى
ونظمى ده أنا يعنى
أشكر مرورك

Unknown يقول...

ربنا يحفظك
يحفظ (نظمى)
اللى هو أنت :)
ربنا يطمنا عليك يارب

همزة يقول...

كلمات رائعة واحساس صادق
و مصر اكيد فخورة بابنها :)

تحياتي

حسن ارابيسك يقول...

بجد جميلة جداً
وانت كاتبها بحس عالي جدا
حس مصري بيحب وطنه بجد
تحياتي

Unknown يقول...


thx

كشف تسربات المياة
غسيل خزانات
شركة نظافة عامة

fdsfsdd يقول...
أزال أحد مشرفي المدونة هذا التعليق.